This book is on the bibliography of children book in Nepali. It has not listed the books but gives a brief introduction on books too.
करिब दुई दशक अघिसम्म पनि नेपाली बालसाहित्यलाई महत्व नदिइएका कारण यस क्षेत्रको विकास ढिलो गतिमा भएको देखिन्छ । यस्तो स्थितिमा नेपाली बालसाहित्यअन्तर्गत कुन विधामा कस्ता किसिमका कृति कसले लेखेका छन् , के–कस्ता प्रकाशकहरूको यस क्षेत्रमा संलग्नता छ भन्ने तथ्यबारे खोजविन गरी नेपाली बालसाहित्यबारे सबैलाई जानकारी गराउने प्रयोजनहेतु नेपाली बालवाङ्मय परिचयकोशको निर्माण गरिएको हो । यस कोशमा प्राप्त भएसम्मका बालसाहित्य र बालवाङ्मयका करिब १,२८० कृतिहरूबारे जानकारी दिइएको छ । नेपाली बालसाहित्यका क्षेत्रमा यो यस किसिमको पहिलो कृति हो । यस परिचयकोशले नेपाली बालसाहित्यका अध्येता र अनुसन्धानकर्ताहरूलाई नेपाली बालसाहित्यबारे थप अध्ययन अनुसन्धान गर्न सहयोग पुग्ने छ भने बालसाहित्य लेखकहरूलाई विगतमा के–कस्ता कृतिहरू निस्किए, अब विषय, शैली र भाषाका दृष्टिले के–कस्ता कृतिहरू लेखिनुपर्छ भन्ने विषयमा पनि मार्गदर्शन गर्ने विश्वास गरिएको छ ।
प्रमोद प्रधान राष्ट्रिय समाचार समितिका प्रधान सम्पादक हुन् । तीन दशकभन्दा बढी समयदेखि साहित्य र पत्रकारिता दुवै क्षेत्रमा क्रियाशील उनको सम्पादन/सह-सम्पादनमा आठओटा पुस्तक प्रकाशित छन् । त्यस्तै तीनओटा कविता सङ्ग्रह, तीनओटा बाल कविता सङ्ग्रहका साथै केही केही अध्ययनः केही अनुसन्धान (२०४४), नेपाली बालसाहित्यको इतिहास (२०५७) र मोरङमा पत्रकारिताको अर्धशताब्दी (२०६१) उनका महत्वपूर्ण मौलिक कृतिहरु हुन् ।
